Bederfoggend vir Jeugland inwoners
Dit was 'n lekker kuier en bederfoggend vir die inwoners van Jeugland
VANDERBIJLPARK – Die inwoners van Jeugland Tehuis vir Bejaardes het verlede Dinsdag ‘n onverwagse voorsmakie van Kersfees gehad.
Om 10:00 het sowat 50 van die inwoners in die groot sitkamer neffens die eetsaal vergader. Die tafels was feestelik gedek met onder andere gevulde vetkoekies, tuisgebakte kolwyntjies en koekies.
Die sytafel het gekruin onder verskeie pakkies, oorlaai met allerande lekkernye en badkamer benodighede.
Jovan de Lange, wat volgende jaar in graad 11 is, het almal welkom geheet met ‘n sterk boodskap. “Julle is nooit alleen nie.”
Die hele oggend was sy breinkind en hy het met die hulp van sy ma, broers en vriende alles georganiseer.
Na die verwelkoming het plaaslike kinderboek en roman skrywer, Felicia Snyman-Du Toit ‘n kort Kersfeesverhaal voorgelees, alvorens die jongspan die koeldrank en lekkernye uitgedeel het.
Die inwoners het so lekker geëet dat hulle gevra het om hul groot middagete eerder na aandete te skuif.
Terwyl daar geëet is, is Kersmusiek gespeel en tannie Helena het daarop aangedring om Ps. 23 te sing en die Onse Vader te bid.
Nadat elkeen hul pakkies gekry het en nog ‘n laaste koekie of twee geëet het, is almal met groot glimlagte terug na hul kamers.
Jovanhulle het ook seker gemaak om pakkies en eetgoed na die inwoners op die boonste vloere te neem wat nie die verrigtinge kon bywoon nie.
