SASOLBURG – ‘n Gesamentlike operasie deur die Suid-Afrikaanse Polisiediens (SAPD) het gelei tot die ontwrigting van ‘n grootskaalse dagga-operasie in Vaalpark.

Vroeër hierdie maand het die polisie ‘n huis in Vaalpark ontdek waar dagga gekweek en tot sigarette verwerk word terwyl hulle inligting opgevolg het oor Pakistanse buitelandse burgers wat in onwettige sigarette handel.

Tydens die operasie is twee verdagtes in hegtenis geneem en daar is beslag gelê op ‘n groot hoeveelheid dagga, verpakkingstoerusting en groeiligte. Die geraamde waarde van die gekonfiskeerde dagga en toerusting is ongeveer R3m.

“Die SAPD is daartoe verbind om die onwettige dwelmhandel in ons gemeenskappe te ontwrig en te ontbind,” sê die provinsiale kommissaris, luitenant-generaal Baile Motswenyane.

“Ons sal voortgaan om te verseker dat diegene wat betrokke is by die vervaardiging en verspreiding van onwettige middels voor die hof gebring word.”