VANDERBIJLPARK – ‘n Vergrootte milt en twee are digby sy slukderm wat lek. Dit is glo die oorsaak van die 20-jarige Dwayne Pretorius se inwendige bloeding.

Die gestremde jongman van Vanderbijlpark is op 26 Desember na die Sebokeng-hospitaal met inwendige bloeding gehaas, nadat hy bloed begin braak het.

Hy is later na die Tshepong Staatshospitaal in Klerksdorp oorgeplaas waar toetse op hom gedoen is.

Volgens sy ma is hy gisteraand omstreeks 21:00 na die Johannesburgse Algemene Hospitaal oorgeplaas waar hy ʼn spesialis gaan sien en waarskynlik ʼn operasie sal ondergaan.

Sy ma Valerie het reeds ʼn Back a Buddy-veldtog aanlyn begin waar mense kan help met sy mediese onkostes.

Die plan was om hom by Cormed Privaat-hospitaal in Vanderbijlpark te laat opneem sodat hy die beste moontlike behandeling en sorg kon kry.

Daar moet egter ʼn groot deposito betaal word aangesien die gesin nie ʼn mediese fonds het nie.