VANDERBIJLPARK. – ‘n Maagvirus wat uitgebreide infeksie veroorsaak het, het onlangs die lewe van ‘n jarelange inwoner, mev. Susan Allers (74), geëis.
Mev. Allers is op 16 Mei 1950 in Tzaneen gebore en het in Duiwelskloof grootgeword voordat sy mettertyd na die Vaaldriehoek verhuis het.

“Sy was ‘n liefdevolle en sagte soort mens, maar jy het altyd geweet waar jy met haar staan. Sy het altyd probeer help waar sy kon. Ons sal haar veral onthou vir haar groot liefde vir haar familie,” sê haar dogter, Daleen da Silva. “Jy kon haar elke dag deur ‘n ring trek. Sy het altyd so lekker geruik. Sy was baie lief vir musiek en het ook graag gebak en gebrou, sowel as gehekel en gebrei.”

Wyle mev. Allers word buiten haar man, Johan, deur vier dogters, Daleen, Sonja, Marlize en Surina, haar skoonseuns, sewe kleinkinders en vyf agterkleinkinders oorleef. Sy was ook die ouma van die talentvolle sangeres Chrizaan, met wie sy ‘n baie hegte verhouding gehad het.
Haar troosdiens is verlede Maandag by die NG Vaalrivier-gemeente in Vanderbijlpark gehou. Die gesin bedank graag almal wat hulle deur dié hartseertyd bygestaan het.