Dit was ‘n ekstralekker huissport dag
Laerskool D.F Malherbe vier hul 60ste bestaansjaar en het dit afgeskop met 'n geestige huissportdag.
VANDERBIJLPARK – Laerskool D.F. Malherbe het hul 60ste bestaansjaar op ‘n baldadige noot afgeskop.
Die jaar se huissport is laas Vrydag gehou. Die wit, rooi en geel spanne het mekaar op die veld en op die pawiljoene die stryd aangesê.
Die geel span het uiteindelik die oorhand gehad met die baan en veld items, maar dit was die wit span wat die Geesbeker ingepalm het.
Die magtige dreuning van luidkeelse aanmoediging kon van vroegdag in die omgewing gehoor word.
Die leerders het dit veral geniet toe van hul onderwysers teen mekaar meegeding het.
Skoolhoof Willem Botha, wat die naweek ook sy verjaarsdag gevier het, het gesê dit was ‘n uitmuntende begin vir die skool se groot herdenkingsjaar wat beloof om baie kleurvol te wees. Die tema van die jaar is nie verniet, saam kleur ons die wêreld in, nie.
