Vele ou motors kuier langs Vaalrivier
Daar is lekker gekuier en spogmotors besigtig langs die Vaalrivier. Lees meer...

VANDERBIJLPARK – Elke jaar skop die South African Motor Club Association, met die MG Car Klub as gasheer, hul jaar af met ‘n breakfast run.

Sondag was dit weer sulke tyd. Om 09:00 het ‘n groot verskeidenheid motors by die Blokhuis op die R59 bymekaar gekom vanwaar hulle in ‘n stoet tot by Stonehaven On Vaal gery het.

Terwyl die eienaars hul afskop ontbyt geniet het, het hulle motors die aandag van vele besoekers getrek. Daar is om elke motor geloop en van die Bentley tot by die silwer Alfa Romeo is van ver af bewonder. Elke motor het in die son geblink.

“Neem dié kant af. My Alfa is gister blink gevryf, maar hy staan onder ‘n boom. Die voëls, jy weet…” het Juante Frickel beduie voor hy vir die kamera geglimlag het.
Die eienaar van ‘n 1953 Jaguar C-klas het self agter die stuurwiel ingeskuif vir die foto. Die spogmotor is in puik kondisie, maar is bietjie laag om gemaklik uit te klim.
Gelukkig was haar seun naby om sy ma weer uit te help, en dit sonder om sy koeldrank of sy broer sin te mors wat hy in sy een hand vasgehou het.

Jacques Steyn, hooforganiseerder van die dag, sê motors het van so ver as Pretoria en Parys gekom om deel van die breakfast run te wees.
“Ek dink hier is sowat 10 motorklubs se lede hier vandag en ek skat so 150 mense. Dis baie lekker en ‘n groot sukses.”