VANDERBIJLPARK – Dit is een van die hoogtepunte op plaaslike motorfietsklubs se kalenders. Die Poker Run.

Nee, daar word nie regtig kaart gespeel nie, wel ver op motorfietse gery. Die dag word al sedert 1987 deur die Centurions MC Vaal gereël en trek jaarliks meer as 150 motorfietse van verskeie klubs.

Die manne en dames met hul ysterperde het van vroegdag by die Centurions se klubgronde bymekaargekom. Hier het elkeen hul eerste toegeplakte koevert gekry met ‘n speelkaart en ‘n aanduiding van hul eerste stop.

By 10:00 se koers het die motorfietse begin om die lang pad aan te durf. Hul eerste stop was in Fochville waar hul nog ‘n koevert gekry het en gehoor het dat hul volgende bestemming in Loch Vaal was.

Daarna is daar nog in Sasolburg en in Vanderbijlpark aangedoen. Almal moes weer teen 16:00 Centurions wees waar hul koeverte oopgemaak is en die een met die beste Pokerhand ‘n naweek vir twee in Clarens gewen het.

Hierdie jaar se wenner was André Swanepoel. Hooforganiseerder van die 2025 Poker Run, Lorin Blake-Zwarts, sê almal het die dag baie geniet en dat hul saam met die wegbreek naweek sommer baie ander pryse gehad het wat die middag uitgedeel is.

DJ Ben het die musiek verskaf en die dag is op ‘n hoë noot afgesluit.