Die Vaal ST Crew is ‘gefokus’
VANDERBIJLPARK - As jy die trotse eienaar van 'n Ford Focus ST is, moet jy eenvoudig lid word van die Vaal ST Crew.
Die groep het in Januarie 2024 die lig gesien en spog tans met sowat 40 lede … die een net so trots soos die ander op sy Ford Focus ST.
Nie net kry jy kans om met jou motor te spog nie, daar word ook lekker saam gekuier.
Phillip Steenberg is die man wat die groep tot stand gebring het. “Elke ST wat ek in die Vaal sien, trek ek af en voeg hul een vir een by die groep,” vertel hy met trots.
Phillip was voorheen betrokke by die ST-1 Fueled by Family groep in Johannesburg. Die organiseerders van die groep het Phillip geïnspireer om ‘n groep in die Vaal te begin.
“Ons beplan om te groei en meer betrokke te raak in die Vaaldriehoek,” sê Phillip. Hulle beplan reeds ‘n charity run aan die einde van Maart.
“Ons wil graag die grootste car community in die Vaaldriehoek word! Die publiek kan ons social media gaan like en follow op instagram, tiktok, Facebook en YouTube.”
