VANDERBIJLPARK – Die Demokratiese Alliansie (DA) het vanoggend ‘n memorandum aan die Emfuleni Plaaslike Munisipaliteit oorhandig.
Die optog het by die lisensiekantore in Vanderbijlpark begin en by die hoofhek van ELM se kantore geëindig.
Solly Masimanga, die DA se Gauteng-leier, het die memorandum met griewe in die afwesigheid van burgermeester Sipho Radebe aan Hassan Mako, lid van die burgermeester-komitee vir finansies, oorhandig.
Masimanga het in sy toespraak onder meer gevra dat kader ontplooiing en nepotisme binne die munisipaliteit gestaak moet word en dat politici nie insae by indiensneming en toekenning van tenders moet hê nie.
Daar is ook aangedring dat die burgermeester en senior bestuur ‘n leefstyl audit moet ondergaan.
Masimanga het gewaarsku dat die kwessies op provinsiale vlak aangespreek gaan word en ‘n beroep op ELM gedoen om die griewe wat in die memorandum vervat word, aan te spreek. “Die tyd vir julle is besig om uit te loop,” het hy gesê.
Na die ondertekening van die memorandum het Mako aan die optoggangers gesê dat ELM binne 14dae daarop sal reageer.
Daar is ook sterk kritiek uitgespreek oor die R650 miljoen diensleweringtoelae wat aan die nasionale regering terugbesorg is sonder om dit aan te wend om inwoners se lewens te verbeter.
Die swak toestand van paaie, gebrekkige vullisverwydering en die voorsiening van elektrisiteit en water is van die griewe wat uitgelig is.
