Volksies, regte egte ‘Beetles’ in ‘n ry
Van vlak na die Tweede Wêreldoorlog tot in die 1980's was Volksies een van die gewildste motors. Hulle was kanniedoods en dis lekker om sommer in agt op 'n slag vas te loop.
VANDERBIJLPARK – In die tweede helfte van die 20ste eeu was dit ‘n algemene gesig. Die Volkswagen Beetle ook bekend as Volksies was oral.
Mettertyd is hulle deur meer moderne spoedvrate vervang, maar die kewertjies het steeds hul aanhangers.
Onlangs het daar agt (ses in oorspronklike vorm en twee bietjie aangepas) hul staan gekry by die Laerskool Eligwa.
Die motors het blink gepronk in die oggendson gestaan met hul trotse eienaars nie ver van elkeen nie.
Elke Volla het ‘n storie. Craig van der Walt het sy Shorty (‘n oorspronklike 1974-beetle) self omskep tot die astrante pers kewertjie waarmee hy vandag spog.
Bennie Homan se 1963 Volla het nog ‘n linkerhandstuur met ‘n dakvenster, terwyl André Oosthuizen vertel dat sy kewer ‘n 1964-model is wat oorspronklik aan ‘n bejaarde dame in Nederland behoort het.
Henk Jordaan van Vereeniging se Lucy wys haar jare. Die 1974-model het lank gestaan alvorens Henk haar gekoop het. “Ek het haar die Donderdag gekry, dadelik aan die werk gespring en teen die Sondag het sy gery,” vertel hy trots.
Dan is daar die 1972 en 1976 kewers met die name Pepsi en Cherry Coke. Beide kewers word gereeld ingespan om paartjies na matriekafskeid geleenthede te vervoer.
Waar Shorty by verre die kleinste kewer van die lot was, was Bug die grootste. Morné Koekemoer sê sy Volksie is ‘n spesiale Bug met groot drome om eintlik ‘n 4×4 te wees. Met sy grys gewaad, oop kap, groot sitplekke en nog groter wiele, lyk die kewer voorwaar na ‘n Bug met houding.
