As gevolg van die vinnige toename in invloei na die Vaaldam, is ‘n vyfde sluishek gisteroggend (6 April) om 10:00 oopgemaak om watervlakke te bestuur (wat oornag gestyg het as gevolg van die voortdurende reënval in die Vaalrivier-opvanggebied).

Dit is ongeveer 24 uur nadat die Departement van Water en Sanitasie ‘n vierde sluishek by die Vaaldam oopgemaak het.

Inwoners langs die Vaalrivier is reeds deur die departement gewaarsku om voorsorg te tref aangesien oorstromings in sekere gebiede verwag word.

By die Barrage het dit reeds oorstroom en hoewel daar gerugte was dat dit ook reeds in Drie Riviere oorstroom het, was dit egter onwaar.

Vaalweekblad was vandag by die Kliprivier in Drie Riviere en Stonehaven in Vanderbijlpark (area waar dit altyd oorstroom as die sluise by Vaaldam oopgemaak word).

Die watervlak van die Kliprivier in Drie Riviere is wel hoog en het reeds oor die rivierbank gestoot, maar die water is huidiglik nog ver van die paaie af.

In Vanderbijlpark by Stonehaven was die sterk vloed van die Vaalrivier duidelik sigbaar. Ook hier het die rivier op plekke oor die rivierbank gestoot en was van die jetties onder water.

Vaalweekblad hou die situasie dop en sal ons lesers op hoogte hou.