VANDERBIJLPARK– Begin 2024 was die Vaalrivier ‘n groen massa. Plek-plek was daar nie eens ‘n stukkie water te sien nie.

Die waterslaai en hiasinte het die Vaalrivier oorgeneem en vir ‘n wyle het dit gelyk of die onkruid die oorhand gaan kry.

Danksy die ingryping van besigheidseienaars en kenners is die krisis egter afgeweer. Om te voorkom dat dit weer handuit ruk het Rand Water, plaaslike belanghebbendes en omgewingskenners begin saamspan teen die indringer-waterplante.

Van die strategieë wat nou op gereelde grondslag bespreek en toegepas word sluit in biologiese beheer, fisiese verwydering, chemiese behandeling onder streng toesig, asook opvoedkundige veldtogte om gemeenskapsbewustheid te verhoog.

Rhodes Universiteit se Sentrum vir Biologiese Beheer laat as deel van Rand Water se Water Wisespan weekliks biologiese beheer-agente in die Vaalrivier vry.

Hierdie organismes sluit die mot Niphograpta albiguttalis, Megamelus scutellaris-planthoppers en die kewerspesie Neohydronomus affinis in.

Nie net word die verspreiding van die indringerplante beperk nie, die rivier se ekologiese balans word ook herstel.