VANDERBIJLPARK – ‘n Babelse verwarring oor die beweerde ontvoering van ‘n skoolkind op Vrydag 9 Mei is laat gisteraand  tot ‘n einde gebring met die uitreiking van persverklaring deur die polisie. Hiernaas volg die verklaring:

‘n Beweerde ontvoeringsvoorval by die Hoërskool Transvalia op Vrydag, 9 Mei 2025, het ‘n vinnige en gekoördineerde noodreaksie ontlok.

Volgens die verslag, gebaseer op die weergawe van ‘n minderjarige getuie, is aangedui dat ‘n leerder ontvoer is. Dit het gelei tot die aktivering van alle relevante rolspelers en die oprigting van ‘n Gesamentlike Operasionele Sentrum (GOS) om die situasie te bestuur.

Die owerhede het ‘n deeglike opvolg van alle beskikbare inligting gedoen, insluitend ‘n onderhoud met die getuie.

Gebaseer op die verkrygde inligting en die gesamentlike besluit van die betrokke partye, is die GOS omstreeks 01:00 op Saterdag, 10 Mei, gesluit. Alle lede het egter op bystand gebly sou verdere ontwikkelings ontstaan.

Ten tyde van hierdie verslag is geen formele melding van ‘n vermiste persoon of ontvoering ontvang nie. Die voorval is aan alle polisiekantore versprei met instruksies om enige saak of inligting wat moontlik verband hou, aan te meld.

As gevolg van die sensitiewe aard van die saak en die ouderdom van die getuie, kan verdere besonderhede tans nie bekend gemaak word nie. Enige relevante inligting wat na vore kom, sal aan die toepaslike owerhede gekommunikeer word.

Vir enige inligting rakende hierdie voorval, kontak asseblief:

Sers. Thembeka Maxambela
Distrikskoördineerder
Telefoon: 082 468 6834