Die Demokratiese Alliansie (DA) doen ‘n beroep op die Voorsitter van die Staande Komitee oor Petisies, Vuyiswa Jentile, om die Uitvoerende Burgemeester van Emfuleni, Raadslid Sipho Radebe, die Munisipale Bestuurder, en senior amptenare te dagvaar om voor die komitee te verskyn nadat hulle daarin gefaal het om dit vir die derde agtereenvolgende keer te doen, ondanks dat hulle formele uitnodigings ontvang het.

Die doel van die vergadering is om dringende petisies rakende menslike nedersettingskwessies aan te spreek, veral met betrekking tot die hernuwing van Evaton Township.

Volgens Reël 148(8) van die Gauteng Provinsiale Wetgewer (GPW) se Staande Reëls, het die Voorsitter die bevoegdheid om getuienis aan te vra en individue te dagvaar om voor die komitee te verskyn. Daarom doen die DA ‘n beroep op die Voorsitter om die magte wat aan haar toegeken is ingevolge die reëls, uit te oefen.

Hierdie aanhoudende afwesigheid verteenwoordig ’n mislukking van hierdie individue om hul grondwetlike verpligtinge na te kom om na die griewe van ons mense te luister en daaroor terugvoer te gee.

Dit is verder ’n oortreding van die beginsels van samewerkende regering en toon ’n gebrek aan respek vir wetgewende toesig.

Indien die Emfuleni-verteenwoordigers weer versuim om voor die Komitee te verskyn, moet hulle in minagting van die GPW gehou en vir hul optrede aanspreeklik gehou word.

’n DA-geleide Gautengse provinsiale regering sal verseker dat al sy aangestelde leiers aanspreeklik, responsief en respekvol is teenoor dié wat hulle veronderstel is om te dien.

Die DA is daartoe verbind om te verseker dat die stemme van Emfuleni-inwoners gehoor word en nie gesmoor word deur dié wat glo hulle is bo enige kritiek verhewe nie.