Die wedstryd is verlede Saterdag by die Isak Steyl-stadion (VUT se tuisveld) gespeel.

Dit was uit die staanspoor duidelik dat die Cobras se hardebaarde net te sterk vir sy teenstanders was. Die jong manne van VUT het die indruk geskep dat hulle ‘n tekort aan ervaring en dissipline het.

Die grootste vraag was hoe ver die Cobras sou wen. Die eindtelling was 40-21.

“Dit was ‘n goeie begin vir die liga en ons hoop om verder op die welslae te bou. Die manne het regtig hulle hande opgesteek, maar ons het nog harde werk vir dit wat voorlê,” het hoofafrigter Deon van Rooyen aan Vaalweekblad gesê.

Uit ‘n speler se oogpunt het kaptein Nardus van der Merwe ook goeie terugvoer oor die wedstryd gegee. “Skrums en lynstane het goed gewerk en ons voorspeler-struktuur het gewerk as ons bal in hand hou en geen snaakse goed doen nie.

“Agter het dit op tye goed gegaan as ons die bal deur die hande sit. Hulle het ons onder druk gesit met die vinnige opskiet en as hulle bal in hand kry was dit moeilik om hulle te stop met die spoed en voete.

“Maar die seisoen lyk blink as die manne getrou bly, en beserings ons uitlos kan dit net beter gaan.”
Die Cobras kom vandat op sy tuisveld by die DP de Villiers-stadion, teen die Kemptonpark Wolwe te staan.

Die tweede spanne is om 14:40 in aksie en die eerstes spanne skop om 15:00 af.