Ster en Vaalweekblad se personeel snuffel graag deur ou koerante in ons argiewe om te sien wat jare gelede in die nuus was. Dit is altyd lekker om die ou berigte op te volg en vas te stel wat geword het van die mense oor wie ons destyds foto’s en stories geplaas het.

So kom ons toe af op ‘n foto van ‘n jong “bruidspaartjie” in ‘n Ster uit 1992: Die skattige Christell le Roux en Gareth Steyl, wat onderskeidelik blommemeisie en hofknapie op ‘n troue in Vereeniging was.
Christell se ma was destyds ‘n bekende bloemiste in die Vaaldriehoek. Sy moes gereeld sorg vir die troukar en is dikwels gevra dat haar kinders ook deel van die bruidsgevolg moes wees. Dis dié dat die jong “bruidspaartjie” toe die koerant gehaal het.

Ster het in 1992 voorspel dat die fraaie klein “bruidjie” op ons foto, ‘n pragtige volwasse bruid sou wees wanneer haar eie troudag eendag aanbreek. Ons voorspelling is reg bewys. Christelle was toe inderdaad ‘n lieflike bruid toe sy onlangs in Dullstroom met Dean Smith getroud is. Hoewel Christell in die Vaaldriehoek grootgeword het, gereeld babawedstryde gewen het en aan die Laerskool Unitaspark en Hoërskool Overvaal skoolgegaan het, is sy nou ‘n inwoner van Malalane.  Só stap die jare aan, né?