CW-inwoners boos na derde brand by Town-substasie in Vanderbijlpark
Daar was wel oor die naweek baie bedrywigheid by die Town-substasie soos daar begin is met voorbereiding vir die herstelwerk, maar daar is steeds geen aanduiding oor hoe lank dit gaan neem om die skade ter herstel nie.
VANDERBIJLPARK – Sowat 30 000 huishoudings sit reeds sedert verlede Woensdag sonder elektrisiteit nadat die Town-substasie in Curie Boulevard vir die derde keer erge brandskade opgedoen het.
Die VF Plus het in 2018 en 2024 met die hulp van ondernemings die dak en mure van die substasie vervang.
“Ons (VF Plus) het herhaaldelik ELM gewaarsku dat die lading wat op die substasie geplaas word, te groot is en om dringende opgraderings te doen. Die waarskuwing het op dooie ore geval,’ sê rdl. Gerda Senekal.
Tans is net ‘n 1×30 MVA-transformator aan die stelsel gekoppel wat hopeloos te min is.
Die substasie wat ‘n uitgestrekte gebied in die CW 1,2,3,5-gebiede (Bopehlong, Bonanne, Stephanopark en omliggende kleinhoewes) van krag voorsien, is ontoereikend.
“Die groeiende gemeenskappe in dié gebied plaas die substasie onder verdere druk. Inwoners van Bopehlong betaal ook nie vir kragvoorsiening nie wat dit moeilik maak vir die munisipaliteit om presies te bepaal wat die kragverbruik in die gebied is,” voer Senekal aan.
“Die VF Plus sal nie sy druk op die Emfuleni-munisipaliteit verslap om hom te dwing om die substasie op te gradeer nie,” sluit sy af.
