VANDERBIJLPARK – Dit was ‘n anderste Vrydag by die Laerskool Totius. Van vroeg af was die opgewondenheid aanvoelbaar en is daar al geloer of die twee skape nog nie opgedaag het nie.

Teen 12:00 was almal uiteindelik op die sportveld, al die stalletjies en speletjies gereed, en het die twee skapies rustig langs die bakkie gras gevreet. Die dag het amptelik Lamloop geheet.

Die doel was fondsinsameling, maar ook om die onderwysers en kinders bietjie kans te gee om hulself te geniet in die winterson voordat eksamens toesak. Die verskillende klasse het in graadverband aan die speletjies deelgeneem.

Daar was bone sakkies gegooi, eier-op-die-lepel resies gehou, rosyntjies gespoeg, tougetrek en driebeen-resies gehardloop.

Die ouer grade het die driebeen-resies nogal half reggekry, maar die juniors se koördinasie was nie heeltemal so in die kol nie. Daar is neergeslaan, gekruip, gehop en baie gelag.

Oral het die personeellede ywerig aangemoedig en selfs meegedoen. Intussen het Totius se gelukbringer, Lammetjie (ten spyte van die warm wintersdag) met kostuum en al deelgeneem waar hy ook al kon.

Waar pas die skape in? Wel, so neffens die atletiekbaan is daar wit blokke met nommers op die gras geverf. Die gedagte was dat die skape oor die stuk grasperk moes wei en waar hul, met permissie gesê, ‘n hopie gelos het, is daardie nommer as wenner aangewys.

Nie dat die skape hul wou laat aanjaag het nie. Van 13:30 het hulle rustig hul gang gegaan voordat hulle uiteindelik die kaartjiehouer van AA24 die wenner gemaak het.