SASOLBURG – MS-Warrior Rozaan Steyn het Saterdag haar tweede Ysbeerswem in die Aldam aangedurf. Dit was die 30ste keer dat swemmers van oraloor gekom het om die yswater in die hartjie van die winter te beproef.

Alles natuurlik vir liefdadigheid. Rozaan en haar ma, Ansie, het saam-saam die water aangedurf.

Hulle het meer as genoeg ondersteuners op die wal gehad, met familie wat so ver as Rustenburg en Welkom gereis het om die skouspel mee te maak.

“Ek was bietjie benoud toe ons 06:00 uit Sasolburg gery het en die temperatuur by -6 en -7°Celsius bly draai het,” vertel Rozaan.

“Ons het in ‘n konvooi van vier motors gery, waaronder sewe swemmers getel het. Gerrie Hadders, mede-MS lyer wou ook graag weer swem, maar het ongelukkig ernstig siek geword.

Met hul aankoms by die Aldam was die temperatuur op die wal 10°C en aan die vlak kant 5°C.

Daar was ongeveer 160 swemmers. Teen 12:00 het die swemmers die water ingegaan. Die gedagte was om 50 m tot by die vlot te vorder en dan weer 50 m terug.

Naas Aldam vind daar die jaar ook Ysbeerswem-aksies plaas in Bloemfontein, Sutherland en Victoriabaai.

“Ek sal graag die een in Sutherland wil aandurf,” raak Rozaan geesdriftig, maar ma Ansie dink nie dis ‘n goeie idee nie en selfs pa Steyn skud kop.

“Jy was al klaar spierwit in die gesig en blou om die mond toe jy uitgestap het. Weet jy hoe koud raak dit in Sutherland?”