VANDERBIJLPARK – Die Vaal spog met ‘n nuut-gekroonde SA bokskampioen in die Cruiser-divisie (81 – 85 kg).

Christo (25) het as Gauteng-kampioen in sy divisie, teen drie teenstanders (Thabo Sikhosana van KZN, Wulama Anje van die Oos-Kaap en John McNeil van Gauteng) om die gesogte titel meegeding.

Christo se eerste geveg was teen Wulama Anje van die Oos-Kaap vir die semi-finale. Christo het met ‘n uitklophou in 2 minute 30 sekondes in die 2de ronde gewen.

Sy tweede geveg was teen John McNeil van Gauteng in die finale. Hy het ‘n eenparige beslissing na 3 rondes in sy guns gekry om as die nuwe SA kampioen gekroon te word.

Christo word deur die bekende oud-bokses, Basil Ray van Vanderbijlpark afgerig. Basil is ‘n baie streng afrigter en hy verwag niks anders as 100% van al sy boksers nie.

Geen verskonings word aanvaar nie, want hy weet wat dit verg om 12 rondtes in ‘n bokskryt te wees.

Hy is toegewyd wanneer dit by sy boksers kom … soos ‘n pa! Hy probeer elke bokser help om hul volle potensiaal te bereik.

Christo besef dat baie van sy sukses aan Basil se uitgebreide kennis van boks (wat oor 46 jaar strek) te danke is.

Daar is egter geen blaaskans vir Christo nie, want die sukses by SAs is net die begin van sy droom.

Christo wil ‘n wêreldbekende bokser wees, en met Basil in sy hoek as afrigter, promotor en bestuurder is dit ‘n haalbare droom.

“Ons is besig om sy pro-lisensie te kry, daarna volg ontwikkelingsgevegte op groot veg-geleenthede, en later natuurlik hoofgevegte,” verduidelik Basil.

Selfs Christo se oefeninge gaan nou meer intens en harder wees, omdat professionele boks dit vereis.

“Dit is die loopbaan wat ek kies. Ek wil professionele bokser wees en is gereed vir die nuwe uitdagings en vereistes,” sluit Christo af.