SASOLBURG – JP Nel (25) swem al vandat hy vyf jaar oud is. Dit was nog altyd sy droom SA internasionaal te verteenwoordig.

JP is onder meer aandagafleibaar en tas sensitief. Dit is een van die redes waarom hy swem so geniet. Dis nie ‘n kontaksport nie.

Sy ma, Joan Nel, sê sy het JP op aanbeveling van hul dokter destyds laat swemlesse neem aangesien hy ook ‘n asmalyer is.

Hy het as deel van die Fakkel School of Skills se swemspan in 2015 begin om medaljes in te ryg. Daarna het hy Vrystaatkleure gekry en vele medaljes ook by die SA’s verdien.

Na skool het hy voortgegaan om kompeterend te swem en het hy gekompeteer in die S14-kategorie. Hierdie kategorie groepeer swemmers saam wat ‘n stadiger reaksietyd het en wat sukkel om byvoorbeeld die volgorde van gebeure of patrone te herken of te onthou.

Verlede week het hy gehoor dat hy gekies is om Suid-Afrika by die Virtus Swimming World Championships in Bangkok, Thailand te gaan verteenwoordig vanaf 20 – 30 Augustus.

Hy gaan in die II1 klas swem vir swemmers met intellektuele gestremdheid.
Vir JP is swem meer as net ʼn sport. Dis nou al vir jare sy lewenswyse.

Hy verwys daarna as sy hart sport en is op sy gelukkigste as hy kan swem.
Die SA swemspan moet ongelukkig hul eie fondse insamel om aan die wêreldkampioenskappe te kan deelneem.

JP benodig ongeveer R50 000 wat voor 31 Julie ingesamel moet word.
Die gelde sal gaan vir sy vliegtuigkaartjies, akkommodasie, spandrag, toerusting, etes, vervoer, kompetisie fooie en reis versekering.

Elke donasie hoe klein of groot ook al sal help om JP nader aan sy doel te bring. Daar is ʼn back-a-buddy rekening gestig om JP te help of kontak sy ma by 073 119 0178.