HS Vaalpark sorg vir mens en dier
Dit was 'n besige tweede kwartaal vir HS Vaalpark, maar hul liefdadigheidsprojekte was 'n groot sukses.
VAALPARK – Hoërskool Vaalpark het onlangs twee liefdadigheidsprojekte tegelyk gehardloop.
Die een was om soveel as moontlik bestanddele vir sopbottels bymekaar te maak en die ander die insameling van hondekos, komberse en speelgoed.
Die projekte was deel van Die Kiewiets se werksaamhede. Die bottels met die sopmengsels is geduldig gevul en vasgedraai onder beheer van twee onderwyseresse, Me. Ronè Rottcher en Me. Corli Jannach.
Me. Rozani Heyns en Me. Elanè Storm het die Vaalpets projek onder hul vlerk geneem.
‘n Groep van Die Kiewiets is na die Eureka skool. Die bottels is daar oorhandig en die gedagte was om twee bottels per kind op die skool se voedingskema te voorsien.
Die res van die Kiewiets is na Vaalpets waar die hondekos, komberse en speelgoed afgegee is. Die leerders en die onderwysers het van die geleentheid gebruik gemaak om met veral die jong hondjies te speel.
Mev. Susan Roux sê die Vaalpets projek het reeds in Mei begin toe ‘n pajama-dag gehou is om die eerste fondse in te samel. Van daar het die projek net groter geword.
“Ons is dankbaar vir almal wat bygedra het. “Ons rig ‘n uitdaging aan HTS Sasolburg, Afrikaans Hoër Sasolburg, Hoërskool Sasolburg en Vaalpark Primêr om dieselfde of beter vir die diere in ons omgewing te doen.”
