VEREENIGING – Loslitdag (Casual Day), waar fondse vir mense met fisiese en verstandelike gestremdhede ingesamel word, vind hierdie jaar op 5 September plaas.

Elke jaar is die Eureka Skool vir leerders met erge fisiese en verstandelike gestremdhede voor in die koor as dit kom by die verkoop van plakkers vir die dag.

Eureka se loodsing van die dag is legendaries. Op 8 Augustus trek die skool se borge, vriende en ondersteuners saam vir ‘n gratis ontbyt by die skool met die blinde sanger Vernon Barnard wat gaan optree.

Mense wat graag die dag wil ondersteun en dalk plakkers wil koop vir hul kantoor of organisasie kan Santie bel op 073 181 4096 voor 4 Augustus.

Nog ‘n dag waar plakkers te koop sal wees is tydens die Eureka Spesiale Sportdag wat 30 Augustus plaasvind vanaf 08:30 – 11:30. Verskeie LSED skole ding mee aan alles van rolstoelresies en kruip tot by doelskop en doele gooi.

Dit word nie verniet ‘n spesiale sportdag genoem nie. Elkeen is ‘n wenner en dit eindig gewoonlik met groot glimlagte by die leerders en trane in die oë van die ondersteuners.

Vir meer inligting oor enige van die spesiale dae of om Loslitdag plakkers te bestel kontak vir Santie by 073 181 4096. Plakkers kos R20.