VANDERBIJLPARK – Die presiese oorsaak van die brand wat vanoggend ‘n huis by 121 Mantevrede Kleinhoewes amper heeltemal in puin gelê, moet nog vasgestel word.

Niemand is in die brand beseer nie. Hoewel die aanvanklik noodoproep vinnig uitgestuur is, kon die brandweer nie bereik word nie. Lede van die publiek en inwoners van Mantevrede het kragte saamgespan om self die brand te blus en te sorg dat die smeulende oorskot nie weer vlamvat nie.

Watertenks en selfs die swembad se water is met emmers aangedra om die brand te blus.

Volgens DA-raadslid, Maureen Dosoudil, is daar al voorheen geklagtes ingedien dat die plaaslike brandweer nie in die hande gekry kan word nie.  Die Emfuleni Plaaslike Munisipaliteit (ELM) het onlangs ook ‘n nuwe brandweerwaens gekry, maar dit is onduidelik waar dit gestasioneer is.

“Die skade op plotte kan beperk word, maar wat gaan gebeur in dig geboude gebiede soos informele nedersettings as ‘m brand ontstaan?” wou sy weet.