SASOLBURG – Saterdag het Ouma Sannie Bezuidenhout se familie en vriende saamgekom om haar verjaarsdag te vier. Sy het 97 jaar geword.

Sy is ‘n Vrystater van geboorte en het op die plaas Waterdraai in die Frankfort-distrik grootgeword. Sannie is uiteindelik met Ben Bezuidenhout van die buurplaas Midden getroud en die egpaar het ses kinders gehad.

Later jare het hul dorp toe getrek waar Ben vir die Vrystaat Koöperasie gewerk het tot met sy aftrede. Nadat haar eggenoot in 2002 oorlede is, het Ouma Sannie in die huis aangebly tot 2009.

Daarna het sy in Frankfort in die Swartshofwoonstelle gebly tot op die ouderdom van 94. Drie jaar gelede het sy op aandrang van haar kinders Sasolburg toe getrek, waar sy nou ‘n woonsteleenheid deel met een van haar voormalige skoonseuns.

Van Ouma se ses kinders, lewe drie nog. Sy het 13 kleinkinders, waarvan twee oorlede is, 21 agterkleinkinders en vyf agteragter kleinkinders.

Ouma is steeds helder van verstand en lees graag Engels en Afrikaanse boeke, en geniet haar volwasse inkleurboeke. Sy het twee maande gelede ‘n trappie buite misgetrap en haar heup gebreek.

Ongelukkig kan die heup weens haar hoë ouderdom nie met ‘n operasie herstel word nie. Soos haar dogter, Alta Pienaar sê: “Deur die genade van Bo en haar goeie versorger het sy sodanig herstel dat sy reeds ver ente met haar loopraam stap en kan sy weer haarself help.”