VANDERBIJLPARK – Solidariteit Helpende Hand Vanderbijlpark-tak in samewerking met AVBOB het op 8 Augustus ‘n spesiale oggend vir die inwoners van Huis Siësta gehou.

Daar is eers sit-sit ‘n paar strekoefeninge gedoen en toe is die inwoners in drie spanne gedeel, die Hasies, Leeus en Olifante.

Intussen het die kunstenaar vir die oggend, Ruan Tennant al die pad van Pretoria, opgedaag.

Met sy natuurlike aanslag om op sy voete te dink en te vermaak, het hy gou almal om sy pinkie gedraai. Sy weergawes van Elvis Presley se liedjies het goed byval gevind.

Tussen sy sang, is daar noteraai gespeel. Almal is na die speletjies en optrede met varsgebakte kolwyntjies bederf.