SASOLURG – Dis elke jaar ‘n goeie resep vir lekker kuier, maar ook georganiseerde chaos.

Dis eenvoudig, meng 650 minihokkie spelers van 10 skole, hul ouers, ondersteuners, kosstalletjies, goeie musiek van ‘n plaaslike radiostasie en jy het Noordskool Primêr se jaarlikse mini-hokkie dag.

Op 23 Augustus het Noordskool, Heilbron, Lumiére, Leeuwspruit, AJ Jacobs, Parys, Emfulenipark, Eligwa, Fonteine en Deneysville se minihokkiespanne (dis nou van Gr. R – 3) weer laer getrek om saam te speel.

Hierdie jaar het hulle ook vir die eerste keer tennis aangebied en vier skole het daar meegeding. Organiseerder juffrou Angie Potgieter sê dat tennis voortaan deel van die dag sal wees.

Die groot aksie was egter steeds op die minihokkie velde waar selfs die doelhokke baie kleiner is en netjies versier was met Noordskool se skoolwapen.

Hul mascot, McFlame, was oral te sien en het groot byval by al die skole se spelertjies gevind. Langs die velde het die skool se prefekte soos wafferse “cheerleaders” te kere gegaan.

Hul opdrag was eenvoudig, “sorg dat julle met dieselfde geesdrif al die skole ondersteun,” en hulle het!

Op die bane het die jongelinge mekaar ywerig die stryd aangesê, al was sommige se hokkiestokke amper langer as hulle. Die skeidsregters en afrigters het bontgestaan om seker te maak almal weet darem watter kant toe om te speel.

“Hierdie dag word gehou om die kleintjies die kans te gee om te kan speel. Alle wedstryde is vriendskaplik en daar word seker gemaak die kinders geniet dit. Dit gaan daaroor om ‘n goeie gees op en langs die veld te hê,” het Angie gesê.