VANDERBIJLPARK – Lentedag het onder ‘n donker wolk aangebreek na twee lewens in die slag gebly het tydens ‘n ongeluk vroeg vanoggend tussen 03:00 en 04:00.

Die ongeluk het net buite die dorp op die Potchefstroompad naby Little Egypt gebeur. Die oorledenes se identiteit is nog nie bekend nie.

Volgens hulpverleners op die toneel het die oorledenes NWU-logo’s op hul klere gehad. Hulle was vermoedelik onderweg na die NWU-kampus in Potchefstroom.

Daar was geen ander voertuie in die ongeluk betrokke nie.

Dit wil voorkom of die bestuurder beheer verloor het om die draai en teen ‘n paal gebots het.