SASOLBURG – Met groen en geel blommetjiekrone het 24 van die Graad R en RR leerders van Lumiére Primêr in Vaalpark die inwoners van Ons Gryse Jeug tehuis besoek.
Die jongspan was baie opgewonde terwyl hulle buite gewag het vir al die ooms en tantes om sitplek in te neem. Nadat hulle ‘n slag ‘n draai gaan stap het om vir die duiwe in die bome te luister, kon hulle uiteindelik in die eetsaal stap.
Onder leiding van juffroue Amanda Greeff en Marquerite Jansen Redpath het die kleingoed eers amptelik goeiemôre gesê, voordat hulle ‘n paar liedjies gesing het.
Die inwoners het veral die Lumies se dansie op Lyfie van Bernice West geniet en het saamgesing toe die jongelinge wegtrek met Dis Heerlike Lente.
Daarna het hulle met groot konsentrasie en heelwat organisasie van die onderwyseresse, vir elke inwoner ‘n mooi versierde kolwyntjie gegee en heelwat drukkies uitgedeel.
Terwyl die inwoners hul kolwyntjies en tee in die eetsaal geniet het, het die Lumies buite op die gras ontspan met ysies en hul kosblikkies.
