Ongelukkig verdwyn misdaad nie saam met die winter nie. Dus moet mense wat buitelug-byeenkomste met familie en vriende geniet steeds veiligheidsbewus wees.

Charnel Hattingh, groepshoof van Bemarking en Kommunikasie by Fidelity Services Group, waarsku dat misdadigers geleenthede waar mense bymekaarkom om te ontspan en te vier, as maklike teikens beskou.

“Gewapende rowers teiken gereeld gaste terwyl hulle restaurante verlaat. In baie gevalle lê misdadigers in parkeerareas en wag vir die regte geleentheid om toe te slaan. Opportunistiese misdaad duur slegs sekondes. Die beste manier om jouself en jou gaste te beskerm, is om waaksaam te bly en die regte sekuriteitsmaatreëls in plek te stel,” sê Hattingh.

Hier is ‘n paar praktiese veiligheidswenke:

As jy tuis onthaal, maak seker dat alle stelsels (buite-straalbundels, elektriese omheining en kringtelevisie) funksioneel en geaktiveer is.

Hou hekke gesluit al wag jy dat gaste arriveer. Sluit slegs vir hulle oop en wees waaksaam wanneer jy dit doen.

Dra ‘n paniekknoppie te alle tye op jou persoon. ‘n Stil paniek kan lewens in ‘n noodgeval red.

Laat gaste, indien moontlik, binne-in jou eiendom parkeer. As hulle buite moet parkeer, kan ‘n sigbare sekuriteits teenwoordigheid misdaad afskrik.

Installeer behoorlike beligting soos bewegings-sensorligte.

Versoek ekstra patrollies as jy aan ‘n sekuriteitsverskaffer behoort. Die sigbare teenwoordigheid van ‘n gewapende reaksievoertuig is hoogs effektief.

“Sekuriteit behoort nie jou pret te demp nie, dit bied gemoedsrus,” sluit Hattingh af.