VEREENIGING – Die Hoërskool Overvaal se o15-krieketspan het verlede week op sy tuisveld ’n puik oorwinning met 5 paaltjies oor die Hoërskool Sasolburg behaal.

Sasolburg is vir 79 lopies uitgeboender, met Ruan Coetzer wat 3 paaltjies vir 25 lopies geneem het, terwyl Cameron van der Walt (2/13) en Ryan McLean (1/2) ook belangrike bydraes gelewer het.

In sy kolfbeurt het die Valies se Dean Coetzer met 34 lopies van 17 aflewerings uitgeblink, terwyl Ruan Coetzer met ’n stewige 12* die wenlopies geslaan het. Overvaal het die teiken van 80 bereik met 5 paaltjies staande.