VANDERBIJLPARK – Vaalpark Primêr se proppie projek is al legendaries in die Vaaldriehoek.
Elke jaar raak die kompetisie al hoe strawwer om te kyk wie die meeste proppies kan insamel, want hoe meer proppies daar is, hoe meer rolstoele kan geskenk word.
Ruardt en Maruche Herbst het hul vriende, familie en familie se vriende al aangespoor om proppies te versamel. In 2023 het Ruardt die stryd nog alleen aangesê en 13 000 proppies in totaal gehad.
In 2024 het Maruche, toe in graad 1, saam met haar boetie begin werk en hul spanpoging het 40 000 proppies as resultaat gehad.
Hierdie jaar het hul met nog groter geesdrif in geklim en oor die naweek het hul al die proppies skoongemaak en getel. Hulle het hul eie verwagting oortref en 82 000 proppies ingesamel.
Die proppies sal Donderdag skool toe geneem word wanneer al die leerlinge hul proppies moet inbring om geweeg te word en om te bepaal watter klas en individu die meeste proppies vir die jaar ingesamel het.
