VANDERBIJLPARK – Daar is lank beplan aan die groot okkasie. Die Hoërskool Vanderbijlpark Klas van ’85 se 40-jaar reünie. Daar is selfs ‘n komitee gestig onder leiding van president Pieter Mocke.
Die groot naweek het uiteindelik 2 Oktober aangebreek met oud-Bijlers wat van heinde en ver op Ingwe Lodge net buite Vanderbijlpark toegesak het.
Dit was dadelik ‘n gegons soos wat gesprekke opgetel is waar dit vier dekades gelede laat lê is.
Die voormalige klasmaats het dit ook geniet om weer hul aardrykskunde onderwyser, Mnr Wollie Wolmarans in die oë te kon kyk en lekker saam met Mev. Rina Bosch, of Ma Bosch soos wat sy al die jare bekend gestaan het, te kon kuier.
Sanet Reyneke het na die naweek gesê: “Hierdie was ‘n ongelooflike kuier-naweek. Die feedback wat ons gekry het na die tyd het my laat lag en party keer ‘n traan laat pik.
“Ons was glad nie vreemd vir mekaar nie. Dit het gevoel of ons net aangegaan het na ons matriek jaar alhoewel daar 40 jaar verloop het.
“Daar is besluit dat ons almal weer in Maart 2026 saam kuier, al is dit net ‘n vinnige bring en braai. Bijlers Bo!”
