SASOLBURG – Sondag het twee van die land se beste vermaaklikheidskunstenaars en pianiste voor ‘n bykans vol Etienne Rousseau Teater verskyn.

Coenie de Villiers en Rocco de Villiers is uiteenlopend van aard, maar albei geseën met hope talent.

Coenie was, soos altyd, netjies geklee in sy swart broek en baadjie en Rocco was sy natuurlike uitspattige self in ‘n giggelgeelbaadjie, kortbroek en tekkies.

Hulle het van meet af die gehoor in die holtes van hul bekwame hande gehou.

Met skerp kwinkslae, en veral Rocco wat gereeld van die teks afgewyk het, het die gehoor se lagspiere oortyd gewerk, terwyl mens tydens hul musikale uitvoerings kort-kort ‘n wow of ‘n sjoe gehoor het.

Die manne het behoorlik elke genre onder die klawers laat deurloop van ballades tot Rock, klassiek en boeremusiek.

Tussenin is daar stories vertel en Coenie het ‘n hoendervleis mooi gedig uit Rocco se nuwe digbundel voorgelees, terwyl Rocco die agtergrond musiek verskaf het.

Met hul laaste wuif, het ek gewonder hoekom hul vertoning so kort was. Groot was my verbasing toe ek besef daar het meer as ‘n uur en ‘n half verloop.

Soveel talent, soveel passie. Hulle het almal weggevoer gehad na ‘n ander wêreld waar stres nie bestaan nie en net vreugde en musiek sin maak.

Dankie aan Herman van Niekerk wat die twee musiekreuse Sasolburg toe gebring het.