Hoekie deur na ATKV Redenaars Finaal
Die ATKV Redenaarskompetisie 2026 staan einde se kant toe. Met die semi-finale agter die rug, is een Hoekie se oë gerig op die finaal.
VANDERBIJLPARK – Hoërskool Driehoek is trots op hul leerders wat in die ATKV-redenaarskompetisie presteer het. Ses Hoekies het onlangs aan die Gauteng-Oos semifinale in Benoni deelgeneem.
Daar het Jowan Kemp (Gr. 9) uitstekend gevaar. Hy het deurgedring na die landsfinaal wat op 4 en 5 Augustus by ATKV Klein-Kariba plaasvind. Jowan gaan in die huistaal voorbereide en onvoorbereide kategorieë deelneem.
Inamari van Dyk (Gr 8) het ʼn skitterende vierde plek in die Top 10 vir huistaal onvoorbereid behaal, terwyl Maarten van Helden (Gr. 9) die vyfde plek vir huistaal onvoorbereid ingeneem het.
HS Driehoek het op hul Facebookblad gesê: “Ons is HOEKIE-trots op hierdie leerders wat ons met trots verteenwoordig! Sterkte aan Jowan met die voorbereiding vir die landsfinaal.”
