VANDERBIJLPARK – Die Sedibeng Premier-liga (SPL) vier vanjaar sy 11de verjaarsdag. Baie dinge het in hierdie tydperk verander, maar een ding bly onveranderd: Die gees langs die veld. Die T20-toernooi vir o11 en o13-krieketspanne is ‘n instelling en hoogtepunt op die laerskole sportkalender. Maar dis nie net die spelers wat uithaal en wys nie.

Die ouers en ondersteuners maak geen geheim waar hulle krieketlojaliteite lê nie. Vanjaar was daar selfs ‘n paar Pappa Smurfs, Casa de Gallo hoendertjies en kraaie en pienk tutu-rompe langs die veld te bespeur. Saterdag 8 November het die eindstryde van die reeks op die Hoërskool Transvalia se velde plaasgevind. – Kyk uit vir die wedstrydverslag en nog pragfoto’s in Vaalweekblad en Ster.