VANDERBIJLPARK – Hy was ‘n bekende figuur wat in talle aspekte van die gemeenskapslewe ‘n noemenswaardige rol gespeel het. “My pa was ’n vriendelike, behulpsame mens. Ons gaan hom so baie mis,” vertel Emil, een van wyle Oom Koos se drie seuns.

Oom Koos was ‘n Valie in murg en been. Hy is in 1939 in Vereeniging gebore, waar hy sy skoolloopbaan voltooi het. Sy professionele loopbaan het in 1959 by Ford in Vereeniging begin, waar hy sy ambag verrig het.

Een van die hoogtepunte in sy loopbaan was egter toe hy later ‘n onderwyspos by die destydse Hoër Tegniese Skool Vereeniging aanvaar het.

Dit was ook in die Vaal waar hy die liefde van sy lewe, Judy, ontmoet het. Die egpaar het in September hul 64ste huweliksherdenking gevier.

Oom Koos het ‘n passie vir liggaamsbou gekoester. Dit het daartoe gelei dat hy in die 1990’s sy eie gimnasium, Triangle Health Gymnasium, in Vanderbijlpark gehad het.

Hy was eweneens ‘n bekende en respekvolle figuur in plaaslike rugbykringe, waar hy selfs as afrigter by die destydse Vaaldriehoekse Curriebeker-rugbyspanne betrokke was.

“Hy het deur die jare baie mense se lewens geraak en het geen vyande gehad nie,” benadruk Emil.

Oom Koos se gesondheid het sowat twee maande gelede begin agteruitgaan. Ná ‘n klein rugoperasie het sy toestand ongelukkig verswak, en hy het die stryd op 23 Oktober verloor.

Hy sou op 26 November sy 86ste verjaardag gevier het.

Oom Koos laat ‘n skatkis van goeie herinneringe agter aan sy vrou Judy, sy seuns Pieter, Riaan en Emil, asook sy kleinkinders en agterkleinkinders.