VANDERBIJLPARK – Die Ankerskool se Kersmark vind elke jaar rondom einde November plaas. Dis asof dit die feesseisoen aankondig.
Die mark strek oor twee dae en elke jaar is daar iets anders wat die verbeelding aangryp. Hierdie jaar was dit so hittete of die 12de mark moes uitgestel word.
Die ongekende baie reën in November het die organiseerders laat kopkrap. Sal hulle uitstel of sal hulle nie?
Maar, ‘n boer maak ‘n plan en binne twee dae het hulle ‘n tent gehuur, die stalletjiehouers in klaskamers en die wat kon onder gazebo’s gekry en besluit die mark gaan aan.
Vrydag het die weer glad nie saamgespeel nie. Reeds by die hek het die hekwagte gewaarsku dat “tannie so na as moontlik aan die kant moet stop.” In die middel van die rugbyveld het groot plasse water geblink.
Met die gras wat sloesh-sloesh skoene wou insuig en die reën koud op die rug, was dit moeilik om al die ware op uitstalling te waardeer.
Dit het egter nie die mense afgesit nie en Annél Willemse, wat haar tuisgemaakte juweliersware in ‘n klaskamer kon uitstel, het gesê dit het besonder goed gegaan met verkope.
‘n Kragonderbreking in die area Vrydagoggend het dit ook moeiliker gemaak en mens kon van ver al die kragopwekker hoor dreun.
Van die dorp se laerskoolhoofde en adjunkhoofde is tussen die baie mense op die stoepe gewaar.
Laerskool D.F. Malherbe se hoof, Willem Botha, het sy sambreel vergeet en was behoorlik natgereën. Ten spyte daarvan het hy steeds breed geglimlag en seker gemaak hy sien alles wat te siene is.
Saterdag was die weer heelwat warmer en droeër. Die sypaadjie reg rondom die skool was gepak met motors, die meeste met modder, maar niemand het omgegee nie.
Binne het ‘n feestelike atmosfeer geheers. Die manne het mekaar die stryd aangesê in ‘n sosatie-braai kompetisie terwyl Johnny Takbok en PROP se musiek vanuit die saal gehoor kon word.
Na baie proe het die beoordelaars hul punte oorgegee om getel en geverifieer te word. Anker se skoolhoof Francois du Toit het ‘n derde plek losgebraai, Wikus Strydom was tweede en Jaco Geyer is as braaimeester aangewys.
