VANDERBIJLPARK – Thomas Junior Sithole (17) se familie is rasend opsoek na antwoorde nadat hy Vrydagaand, 9 Januarie spoorloos na ‘n uitstappie op die Vaalrivier verdwyn het.

Na wat verneem word, het Sithole, ‘n leerling aan die Hoërskool Driehoek, vermis geraak nadat hy saam met vyf vriende op ‘n boot ‘n kuierplek langs die Vaalrivier besoek het. Die bestuurder van die boot was een van die minderjarige kinders se ouers.

Die groep het omstreek 18:00 teruggekeer van die kuierplek waar hulle drankies geniet het en toe hulle besef dat Thomas nie teenwoordig was nie.

Volgens Sebongile Radebe, ‘n familielid van Sithole, het die minderjarige seuns teenstrydige verduidelikings gegee het oor wat presies gebeur het, maar daarop aangedring het dat Thomas nie onder die invloed van drank  was nie.

Volgens Radebe was die seuns besig om van sitplek te verwissel terwyl die boot beweeg het, toe Thomas na bewering na die agterkant van die boot gegaan het om ’n koeldrank te kry. ’n Oomblik later het hulle glo besef, dat hy nie meer aan boord is nie.

Die groep het glo na die betrokke kuierplek teruggekeer om seker te maak dat hy nie moontlik agtergelaat is nie. Volgens Radebe-hulle is hulle ontsteld en uit die veld geslaan dat hulle eers om 22:00 van Thomas se verdwyning ingelig is.

Daar is glo kringtelevisiemateriaal wat die groep se besoek aan die kuierplek langs die Vaalrivier bevestig.

Die watervleuel was reeds op die toneel en sal vandag omstreeks 10:00 hul soektog voortsit.