VANDERBIJLPARK – Om gorillas in hul natuurlike habitat te kan beleef is nie vir elkeen beskore nie. Die geluk het Hennie de Klerk verlede jaar ter beurt geval.
Hy was eintlik op ‘n navorsingsreis om miskruiers af te neem in Kenia, toe hul die geleentheid kry om Uganda vir drie dae te besoek. Dit was ‘n groot avontuur net om daar te kom, maar Hennie sê die mense is baie vriendelik.
Groot was sy opwinding toe hul die Bwindi Impenetrable National Park, ‘n UNESCO Wêrelderfenisgebied in suidwes Uganda, kon besoek.
Met Hennie-hulle se aankoms by die ingang van die park het die kostes amper sy asem weggeslaan, maar hy het geweet dis ‘n eenkeer in ‘n leeftyd kans. Teen $500 per persoon is dit ‘n baie duur kuier in die woud.
In die digste woud tussen die heuwels is daar sowat 400 gorillas, opgedeel in kleiner groepe van tussen agt en 12. Die gorillas bou elke aand vir hul neste, party in die bome en ander op die grond om in te slaap.
“Ons moes ‘n uur wag voordat ons die woud inbeweeg het. Elke gorillagroep word deur drie wagte opgepas en hulle is die heeltyd in radioverbinding met die veldwagters en gidse.
Die wagte het laat weet die gorillas het nog nie afgekom nie, hulle slaap nog” vertel Hennie. Uiteindelik kon hul die steiltes en afdraandes van die woud aandurf saam met ‘n veldgids en ‘n gewapende veldwagter.
Die wapen was meer om die groep teen olifante te beskerm as die gorillas. Toe hul die groep gorillas gewaar, moes almal maskers dra.
“Ons was seker so 8m van hul af. Die eerste een wat ek raakgesien het, het hoog in die boom gesit,” vertel Hennie.
Hy sê die gorillas het hul glad nie aan die mense gesteur nie en net rustig voortgegaan. “Ek dink hulle dink ons is ‘n laer spesie,” lag Hennie. “Ek is nou ‘n groot fan van gorillas.”
