Van die stad na die natuur: Die Kok-gesin se uil-geluk
Die Kok-egpaar het verlede jaar die besige strate van Gauteng verruil vir die rustigheid van die Vrystaat, en vir hulle was dit die beste besluit.
DENEYSVILLE – Hulle het van Vereeniging na Deneysville verhuis, en vir Angelique en JJ, albei passievolle amateurfotograwe met ’n liefde vir die natuur, kon die nuwe omgewing nie meer volmaak wees nie.
Hulle was behoorlik in hul skik toe hulle ontdek dat ‘n paar gevlekte ooruile (Spotted Eagle Owls) in die tuin woonagtig is. Hierdie besonderse roofvoëls is egter nie nuwe intrekkers nie.
“Ons bure, Dale en Paul, het reeds 12 jaar gelede ’n uilboks in ’n boom op die erfgrens ingerig,” vertel Angelique.
“Die uilpaartjie wat daar nesgeskrop het, het oor die jare reeds 25 kuikens grootgemaak.”
Angelique was onlangs gelukkig genoeg om vier van die nuutste jong uile voor haar lens te kry.
Hier is ‘n paar van die treffende foto’s wat sy van hulle geneem het.
