In ‘n vraag- en antwoordsessie in die Nasionale Vergadering (NV) het die minister van minerale – en petroleumhulpbronne, Gwede Mantashe, die week verklaar dat die terughou van brandstof onwettig is. 

Dr. Wynand Boshoff, VF Plus-LP en hoofwoordvoerder: Minerale- en petroleumhulpbronne het in ‘n mediaverklaring meer oor die sessie vertel:

Terwyl die minister verduidelik hoe daar tans geen brandstoftekort in Suid-Afrika is of verwag word nie, is talle vulstasies en groothandelaars tans sonder diesel.

Hulle verklaar dat hulle geen diesel kan kry by die enkele groot oliemaatskappye wat brandstof invoer nie.

Daar is selfs ‘n bewering van ‘n staatsonderneming wat beweer dat hy geen voorraad het nie, terwyl daar sowat 25 miljoen liter in hulle brandstofreservoirs is. Die minister behoort met min moeite te kan uitvind of dit waar is.

Mantashe het aangevoer dat handelaars dit kan doen om onregverdige wins te maak indien die pryse amptelik styg, en sy departement sal teen sulke handelaars optree.

Indien diesel ná die prysverhoging weer vrylik beskikbaar is, sal dit op die misdaad deur handelaars dui.