Die egpaar het Jan se lyfie Saterdagmiddag in die rivier sien dryf en dadelik na die berigte oor die soektog na Jan besef dat dit hy moes wees.

Hulle het op Facebook begin rondvra in ‘n poging om sy eienaar te kry sodat hulle minstens sy halsbandjie aan sy eienaar kon gee.
Jan het in die rivier beland toe ‘n boot deur ‘n sluishek oor die keerwal by die Barrage is.

Hoewel die groep van ses mense na veiligheid gebring kon word na die ongeluk, was daar geen spoor van Jan nie en het verskeie mense en organisasies help soek na die staffie.

“Ons het die lyfie in die rivier sien afdryf voor ons huis,” het ‘n baie hartseer Monica de Jager vertel.

“Aanvanklik het ons gedink dit is ‘n houtstomp omdat daar so baie boomtakke, stompe en opdrifsels in die rivier afgekom het met die vloed.

“Ek het die verkyker gegryp en gesien dit is ‘n hond. My man, Bertie, het na hom gery met die boot, want hy was oortuig dit is Jan.”

Met die grootste deernis het die egpaar Jan se halsbandjie afgehaal, dit gewas en met ‘n Facebook-plasing van die halsbandjie daarin geslaag om Jan se eienaar op te spoor.

Dankie vir hierdie uitsonderlike gebaar van liefde om uiteindelik, ten spyte van die hartseer, berusting vir sy eienaar te kon bring.

* Jett, die geliefde Belgiese herdershond wat help soek het na Jan, se lyfie is ook intussen gevind. Jett het die naweek in ‘n mangat in die Hartebeesspruit in Kilnerpark, Pretoria geval.

Sy eienaar, Diane Logie, het saam met hom in die mangat geval toe daar na ‘n Jack Russel-hondjie gesoek is. Sy kon gelukkig uitgehelp word.

Jet het as snuffelhond gewerk by Healthy Hound Missing Pet Search & Rescue en was hoogs opgelei. Sy eienaar, Diane Logie is mede-eienaar van die organisasie.