MEYERTON. – Hulle sê dat deur een keer bloed te skenk, jy die lewens van soveel as drie mense kan red.

Altesaam 77 mense, wat werknemers van Meyerton Engineering en ander maatskappye in Meyerton se industriële gebied insluit, het Woensdag, 12 Junie hul moue vir ‘n goeie doel opgerol en bloed aan die Suid-Afrikaanse Nasionale Bloeddiens (SANBD) geskenk.

14 Junie is Wêreldbloedskenkdag en Junie is Nasionale Bloedskenkmaand. Wêreldbloedskenkdag is ‘n wêreldwye geleentheid wat deur die Wêreldgesondheidsorganisasie (WGO) begin is om bewustheid oor die behoefte aan veilige bloed te skep.

Volgens Thandi Mosupye, senior bestuurder by die SANBD, is die doel van Nasionale Bloedskenkdag om die noodsaaklike bydrae wat bloedskenkers lewer om mense en gemeenskappe gesond te hou, uit te lig. “”Elke jaar benodig duisende Suid-Afrikaners bloedoortappings tydens mediese prosedures, noodgevalle en vir voortdurende mediese toestande,” sê Mosupye.

In die aanloop tot dié jaarlikse bewusmakingsveldtog het due SANBD ‘n beroep op Suid-Afrikaners gedoen om bloed te skenk. Die bloed wat geskenk word, word geprosesseer en in bloedplaatjies, plasma en rooibloedselle verdeel en kan vir verskillende doeleindes gebruik word.

Hector Cameron, besturende direkteur van Meyerton Engineering, het Woensdag in ‘n kort toespraak, voordat die bloedskenkverrigtinge begin het, gesê: “Ons is natuurlik vandag hier vir die bloedskenkveldtog. Meyerton Engineering kyk hoe ons by meer sosio-ekonomiese ontwikkelingsprojekte betrokke kan raak. Ons wil graag terugploeg in die gemeenskap.”