VANDERBIJLPARK. – Die Johnny Waite-trofee vir o.15 en eerste krieketspanne gaan nerens heen nie.
Die eindstryde van die gesogte T20-toernooi is vroeër vandeesweek op Verref se krieketveld beslis.
Die eerste krieketspan van die HS Dr. Malan van Meyerton is as die Johnny Waite-kampioen gekroon, nadat hy Transvalia oortuigend met 119 lopies gewen het.
Dokkies het 192/8 in 20 beurte aangeteken met Dewald Erasmus (117 lopies van 61 balle) wat met ‘n puik honderdtal die angel uit Valia se boulaanval getrek het.
Vir die verloorspan het Kyle Culter (3-30-4) en Krieger Botha (2-38-4) goed geboul.
Valia is daarna vir ‘n beskeie 73/10 in 15.3 beurte uitgeboul danksy ‘n skitterende boulvertoning deur Kegan Meyer (4-15-3.3)
Die o.15’s van Transvalia het op sy beurt gesorg dat die Johhny Waite-trofee in die Vaaldriehoek bly.
Valia het Krugersdrop High School in ‘n taai eindstryd met 27 lopies geklop. Die wenspan het 132/3 in 20 beurte aangeteken danksy puik bydrae met die kolf deur Floris Pretorius (48*) en Waldo Mc Lean (47).
Die Wes-Randers is daarna vir 105/10 in die 18de beurt uitgeboul danksy ʼn spogvertoning deur Justin Oberholster wat 5/16 in 4 beurte platgetrek het.
