VANDERBIJLPARK – Die eerste rugbyspan van die HS Garsfontein het vroeër vandag in die Jakarandastad op sy nerwe deurgeskuur om die Ligboumasjien van die HS Transvalia met 43-41 te klop. Die telling was rustyd 17-17 gelykop.
Transvalia is vanjaar die verrassingspakket in die SDC Noordvaaltoernooi se beker-afdeling. Valia het vanjaar opgeskuif na die bekerafdeling en sy stem dik gemaak deur Rustenburg (20-13), EG Jansen (39-26) en Menlopark (47-27) in ‘n ry te klop. Die Ligbloues het verlede week in Krugersdorp met 24-22 die knie teen Monnas gebuig.
Valia kom op 26 Julie tuis teen Helpmekaar te staan. Hoewel daar nog baie water in die see moet loop het Transvalia onder leiding van Lloyd Greeff en Gunder Williamson gewys dat hulle week in en week uit met die beste spanne in die land kan meeding.
