Moordsaak word vir die soveelste keer uitgestel
Vier jaar ná ’n bloedige nag wag Lotz se familie steeds vir geregtigheid.
BENONI – Die vonnisoplegging in die moordsaak teen Raymond Metz en vyf medebeskuldigdes, insluitend sy broers en hul ma, is wéér uitgestel.
Raymond Metz, sy broers Shane, Simon, Anton ‘Babatjie’, asook hul ma Lindi Falch is in April 2024 skuldig bevind aan die moord op Benjamin Lotz van Leeuhof, Vereeniging.
Die beskuldigdes moes op 30 Junie vir vonnisoplegging in die rondgaande hooggeregshof in Benoni verskyn, maar weens nog ‘n vertraging met die voorvonnisverslae kon die hof weer nie voortgaan nie.
Regter Carla van Veenendal het die saak uitgestel na die week van 22 September.
Intussen is die borgtog van al die beskuldigdes weer verleng.
Die hof het in April verlede jaar bevind dat die beskuldigdes gesamentlik verantwoordelik is vir die dood van Lotz na ’n gewelddadige aanval by sy huis.
Die konflik het glo ontstaan nadat Lotz vir Raymond en ‘n vriend, Estifaan Delport, gekonfronteer het oor hul luidrugtige musiek in ’n veld oorkant sy huis gespeel het.
Later die aand is Estifaan, Raymond, sy broers en hul ma, Lindi Falch na Lotz se huis, waar hulle die slagoffer met pangas, grawe en bakstene aangeval het.
Lotz het later aan beserings wat hy tydens die aanval opgedoen het beswyk.
Delport het staatsgetuie gedraai en die klagtes teen hom is teruggetrek.
Intussen het Lotz se familie hul ongelukkigheid uitgespreek oor die aanhoudende uitstel in die saak en die feit dat die beskuldigdes se borgtog elke keer verleng word, terwyl hulle al vir vier jaar wag dat geregtigheid geskied.
Die hof het egter beklemtoon dat dit vasbeslote is om ‘n deeglike en ingeligte vonnis te lewer.
