Meyerton se eie liedjieskrywer en kunstenaar, Xander Filmater, het onlangs sy nuutste enkelsnit en musiekvideo, “Val Vir Jou”, bekendgestel – ’n introspektiewe ballade wat luisteraars direk in die hart tref.

Filmater, lid van die groep Ariose, het die liedjie alleen geskryf tydens die einde van ’n persoonlike verhouding. “Dis interessant, want baie liedjies word uit ’n ‘derde persoon’-oogpunt geskryf. Hier het ek direk uit my eie ervaring geskryf,” sê hy.

Die lirieke roep beelde op van maanlig, sterre en reën, en dra die rou emosie van verlies, hoop en volgehoue liefde. ’n Reël wat besonder uitstaan, is: “Maar daar is geen reënboog, steeds sal ek val vir jou.”

Volgens Filmater simboliseer die reënboog hoop – die belofte dat dinge beter sal word – maar soms bly die liefde leef selfs al weet jy dis verby.

Hy beskryf sy klank as “sagte rock, liedjieskrywer-rock” en noem invloede soos die Goo Goo Dolls, Lifehouse en Bryan Adams. “Ek begin soms met ’n melodie, ander kere met ’n emosie of ’n idee. Dit verskil elke keer,” verduidelik hy.

Hoewel hy graag fisiese albums sou wou hê soos in die ou dae, is hy dankbaar vir digitale platforms soos Apple Music en Spotify. “Dit help ons om nuwe luisteraars vinniger te bereik,” sê hy.

Wat lê voor? Ariose het pas nuwe musiek in die ateljee begin verken. “Ons speel met vars idees en hoop om binnekort weer iets nuuts te deel,” sê hy met opgewondenheid.

“Val Vir Jou” is nou beskikbaar op alle groot digitale platforms.