MEYERTON – Die jaarlikse kunsuitstalling van die Dreamz Glass & Art School, onder leiding van kunsonderwyseres Hettie Hayward, is op Saterdagaand, 16 Augustus by Destinata Skool gehou.

Die tema vanjaar was Ancient Rome, met ’n semi-formele kleredragkode.

Volgens Hayward is daar vanjaar ’n merkbare styging in kunswerke wat uitgestal was teenoor vorige jare.

“Ons het ongeveer 250 werke van skole in die omgewing ontvang, veral van Hoërskool Overvaal en Hoërskool Dr. Malan,” vertel sy.

Werke van Laerskool Vryheidsmonument, Laerskool Voorwaarts en verskeie tuisskoolleerders het ook deel gevorm van die uitstalling.

Hayward sê die standaard van die werk was beduidend hoër as in 2024. “Hierdie jaar se werke is oor die algemeen van ’n veel beter gehalte as verlede jaar. Ons het ook iets nuuts probeer deur die werk van jonger leerders saam uit te stal, in plaas daarvan om dit per tema te groepeer soos ons voorheen gedoen het.”

’n Besonderse aspek van die uitstalling was dat die werke van leerders wat kuns as skoolvak neem, deur die onderwys departement geëvalueer is. Hierdie werke tel dus ook as praktiese eksamens vir die betrokke leerlinge.

Die uitstalling het ’n wye spektrum kunstenaars verteenwoordig – van graadeentjies tot volwassenes. Selfs Hayward se moeder, Helene (74), het van haar werke uitgestal. Daarmee is die boodskap bevestig dat kuns geen ouderdomsgrense ken nie.

Werke was te koop teen onderhandelbare pryse, wat belangstellendes die geleentheid gebied het om plaaslike talent te ondersteun en unieke kunswerke huis toe te neem.