WALKERVILLE – Die moontlikheid van parool vir Donovan Moodley, wat skuldig bevind is aan die moord op Leigh Matthews, het die afgelope week opskudding veroorsaak.

Moodley, wat sedert 2018 in aanmerking kom vir parool, het die aanbeveling van die Korrektiewe Toesig- en Paroolraad ontvang, maar die Minister van Korrektiewe Dienste moet nog die finale besluit neem.

Hy is in 2005 skuldig bevind aan ontvoering, afpersing en moord en tot lewenslange tronkstraf gevonnis, maar het intussen ’n regsgraad voltooi.

Kritici meen Moodley toon geen ware berou nie en dat sy vrylating die Matthews-familie se trauma sal verdiep.

Ian Cameron, gemeenskapsveiligheidsaktivis, parlementslid en voorsitter van die Portefeuljekomitee op Polisie, het saam met ander sterk teenstand uitgespreek en die erns van die misdaad beklemtoon. ‘

Voorstanders van parool wys egter op die wetlike proses en evaluasies wat nagekom word voordat ’n gevangene vrygelaat kan word.